首先，因為我的網友圈子收窄了很多，會看我個人生活題材的台灣人不多 (而且看了也沒意思 lol)
所以從此以後，我的生活文章會用廣東話來打。會比較傳神。
好耐冇寫啦~
想當年第一份工，一開始壓力大到不時都要打一篇來抒洩下。
而家唔駛啦，每日返工就算稱唔上開心，至少可以話好充實。而且冇咩壓力
完全冇個種星期一要期待星期五既感覺
我一開始仲以為會好辛苦，畢竟同Engine Grad比，經驗太少啦。但估唔到，難度可以話係岩岩好
或者其實能力係激發出來架啦XD
除左報告下工作近況之外，最近情緒都有D奇怪，明明工作好愉快，但就覺得生無可戀。
唔好覺得驚訝，其實冇乜野，亦都絕對唔係睇唔開，你睇埋落去就知。
【關關難過關關過】
其實到目前為止三個半月，我已經寫完兩個App (雖然第二個只負責一半)
第一個已經Publish左，雖然你應該就唔會用得著，但好奇既話可以睇下佢係咩來
哩個App有唔少部份都係我冇接觸過既 (當然啦XD)
所以有D都真係好有難度
例如，如果你而家去下載，然後去Year-round offers都可以望到，右手邊的Fast Scroll Bar，同每個Section都有一個字母既Header
不要睇小哩兩樣野，其實(至少對當時既我來講)係好難整架
而且除左哩D之外仲有D細節位比想像中麻煩.... 例如你Register，填完一個field跳去下一個繼續打字，一般來講都唔駛特別寫，但如果D Field類型唔同，或者要跳去另一個區域，就要搞到好複雜。就算想將一個Dialog整做圓角都好麻煩....... (不過而家用Fresco哩個Image loading既Library之後就好簡單)
仲有後來Debug左半日先發現到，原來QR Code係有分編碼，手機既QR Code Scanner可以Scan用UTF-8編碼既QR Code；但當時測試個陣用條碼槍Scan，原來唔可以用UTF-8，一定要用ASCII.... 我一直都以為QR Code唔會有編碼之分....
總之，第一個App，雖然整體難度同花既時間，都比一開始預計既少同小；但途中真係遇到好多問題，每天都係挑戰；但咁岩每次挑戰最後總能成功克服，所以我先話每日都過得好充實。
而且就算你發現難度滿足唔到你，你就可以去學D新野，Apply落下一個Project。
我做完第一個App，就即刻去學RxJava，花閎時間又比想像中少，所以係第二個Project就直接用嚕。
唔講唔得，真係好好用。雖然應該冇幾個人知道我講緊D咩XD
【Lunch Alone Forever】
因為我舊公司同事關係真的莫名地好 (可能係因為有「共同敵人」)
所以幾乎每日都會一齊吃Lunch，而且最少都係4個人既規模，有時候一多就10幾個人一齊食。
雖然我早就同自己講，唔好期望係其他公司，同事關係都仲可以咁好；
但我我都估唔到結果幾乎每日都係自己食飯XD
嗱，你唔好覺得我慘，或者話我跟同事關係唔好，
我覺得哩個係一半巧合，一半文化
巧合既部份係，因為我入去之前，食飯既圈子其實就已經固定左；而固定既班底又唔會主動問你一唔一齊食飯，正常的確唔會有咁熱情啦。(雖然我舊公司又真係會咁熱情地對待新同事)
而有兩三個新同事都有自己既原因一個人食。我有嘗試邀請過另一位新同事一齊食，但俾人拒絕左XD (人地有約啦)
而一半文化係指，三個月之後，雖然都可能只係習慣左，但就算我每日一個人食飯，都唔會有跟同事疏遠既感覺 (根本好多人都係一個人食)。而大家的距離亦都慢慢咁一點點地拉近。
做哩行既，一般性格都比較內向啦，包括我。
其實一個人食飯都有唔少好處。例如想去邊就去邊；你有手遊想玩可以盡情玩 (而我公司既手遊文化非常嚴重)；唔駛等位等餐死；食完又可以自己去海濱公園散下步。
【在觀塘區返工真係好幸福】
可能科學園既伙食實在係太垃圾，我覺得觀塘區食飯既性價比簡直就係科學園既無限倍，
你可以去一D工廠大廈裡面既飯堂，30幾蚊就已經有比科學園所有餐廳都好食既快餐。
如果你豪少少，50幾蚊，根本就已經周圍都係美食。
再加上我屋企離牛頭角真的很近 (車程短)，結果我返左工三個月，肥左三公斤....
最近開始努力控制體重QAQ
【生無可戀？】
其實一般來講見到人話生無可戀可能會覺得好嚴重，
但你諗真D，佢只不過係話「生命冇咩值得留戀」，同「生不如死」仲有好大好大既距離~
更何況世界上仲有好多人即使生不如死都寧願繼續堅持落去...
至於點解會咁覺得 - 我諗未必係因為「發生咩事」，只可能係幾件小事既累積，trigger到我再次意識到一個事實 -
「我人生追求既野，其實一直都冇得到過」
熟我既人會知道，受日本動漫啟發薰陶嚴重，我人生追求既係「羈絆」
中文係冇「羈絆」哩個詞語的，而係要譯日文既「絆」而夾硬製造出來既現代詞。
最最最簡單地理解可以話係人同人之間既Bonding，
但我至少會用多少少字，咁樣去定義佢︰「人生在世，無論如何都會有所束縛；真正既自由唯有死亡。而羈絆就係阻止你去追求自由(死亡)既束縛︰當你面臨死亡，有冇唔捨得割捨既關係？」
而當我咁樣問自己既時候，好遺憾，好似真係冇。
At least 冇好唔捨得囉... 當然好Friend既人都係有既。但又未至於令我會留戀現世咁。
所以其實係真係我自己問題。於是我係度諗，係咪自己既感情愈來愈麻木，變得咩都感受唔到。
尋晚同兩個舊同事食飯，都有傾哩個問題。
我(地)既結論係，其實我對關係既Expectation太高，導致期望有落差造成失望。
我之前對母親都係咁。深受CLANNAD影響，我覺得親人係好重要既關係，係我最容易可以建築羈絆既關係。
但咁多年落來，最後我都係放棄左。父母唔係可以選擇既人，佢地既三觀實在可以同自己差好遠。換句話講，如果佢地唔係你父母，你根本永遠冇可能同佢地做朋友。
於是我大幅降低我對母親既Expectation。之後我地既關係就明顯有改善；但哩種改善係相處上既改善，少左鬧交，但「羈絆」就好弱。唔會唔捨得自己既母親喎！
而最近我亦都發現，我以為係好好既朋友，點解好似識得愈耐，關係反而愈差？
其實係咪人地根本冇當我係好好既朋友，只係我自作多情咋？
定係因為我以為同人地距離好近，結果人地反而驚左我，好似磁鐵咁俾我推返走？
而有個舊同事講左一言，都有少少驚醒夢中人既感覺︰
你地可能成日一齊玩，好有共同興趣，令你有好Friend既錯覺；但其實你同佢地根本就唔夾。
事實上我同好多「我以為好好既朋友」，甚少談心。反而同尋晚食飯既其中一個舊同事傾得仲多，仲自然。哩個我自己都覺得係一個有力證據。
所以到頭來，又係Expectation既問題。我以為好Friend，期望大家關係係好好，但原來唔係。
於是，我開始降低返我既Expectation，同時嘗試減少Group形式既溝通，盡量多D單對單，睇下會唔會有幫助。
總結 - 捨得父母，捨得朋友，冇女朋友俾我唔捨得，咁咪生無可戀囉。
人類是犯殘的，我承認我可能身在福中不知福。既然係咁，就應該將自己係福中抽返出來，重新激活返對幸福既觸覺。
留言列表
