好耐冇打Blog啦！
And 小弟終於係2021年11月28號結左婚啦！！
同時返工 + 搞結婚 + 搞裝修真係Chur過當年考公開試，結完婚即病 (其實係病住結)
我係同輩裡面都算係比較早結婚果批，為左後人可以順利D搞婚禮，我決定分享一下我搞婚禮既心得，幫得幾多係幾多
但事先聲明，我同我老婆搞婚禮既心態都係滿足四大長老既基本要求，亦即交差，而唔係搞一場好精彩既婚禮（雖然結果兩家大量長輩都讚搞得好好）
如果你係自己想搞一場好完整好美滿好精彩既婚禮，咁我哩篇充其量只係有過到合格線既參考價值，你一定要再自己搵多D資料，同埋要捨得使錢。
結婚畢竟都係大事，哩個頭盔我一定要戴︰下面既內容只係我個人既心得，我既目的係為提供參考價值，幫助新人迅速上手，而唔係指導你點樣舉辦婚禮；所以千祈唔好照單全收，亦都唔好止步於此。
第一章︰心態
我覺得最重要既係，要諗清楚你搞婚禮既目的
因為視乎目的同要求，你可以由最簡單既剩係簽紙，到搞一場大龍鳳做哂所有野
我撇除剩係簽紙哩個選項啦，結個婚，坊間標準通常由以下幾個環節組成︰
1) 影婚紗相，亦即香港人講既 Pre-Wedding
2) 中式︰過大禮
3) 中式：上頭
4) 中式︰出門、入門、敬茶
5) 證婚儀式
6) 宴會
7) 回門 (其實哩個好Minor，但姑且叫做一個環節啦)
【避免 Overkill】
我自己係做哂上面7樣野，但究竟你係咪真係有需要做哂呢？
舉個例，我估大部份新人其實私心都只係想搞 1 同 5，而四大老長就會想搞埋 2 3 4 6
但其實未必，可能有D長老其實靠「宴請各方親友」都過到關，有冇可能唔駛做 2 3 4 呢？如果只係宴請親友，有冇可能唔駛跟足傳統晚宴既流程，只係Book個場請主要親友食飯呢？
我最初本來係有 1 + 5 + 請人食飯哩個選項，但我愚昧地認為「反正都係要證婚 + 請食飯，咁其實同傳統果D婚禮同一日搞哂好似差唔多啫」，就咁做哂所有野，實在太天真太傻。
因為，2 3 4 5 6 如果跟坊間標準去做，其實有好多細節要事先準備、安排，亦都需要大量物資。
反而如果只係證婚 + 請食飯，你可以單純使幾萬蚊搵D輕婚禮公司，佢會幫你做哂所有野，有攝影有錄影有場地有佈置有律師有服裝，你乜都唔駛煩，然後搵一D比較親既親友觀禮，剩低只係需要Book食飯場地就搞掂，輕鬆好多。
又，如果你不幸地係需要做哂 2 3 4 5 6（其實好多時係你父母聽命於祖父母，因為最傳統其實係祖父母），
同埋，就算需要做哂 2 3 4 5 6，當中係咪每一樣細節都需要做足呢？
好多時其實四大長老都唔係好識，於是你就上網搵資料做功課。結果你會搵到好多資料，哩樣又要做果樣又要做。
哩個時候，我建議你唔好覺得要跟足哂你搵到既野來做。如果你發現可能可以省略既地方，我建議真係拎出來同四大長老傾下，盡量簡化，咁你既Rundown又會簡單D，出事既機會又低D。
我認為並唔係做得愈多，四大長老就愈滿意；你應承既野多左，佢地既期望就會高左，咁一旦出事，佢地期望落空，自然就唔開心。
反而，一開始就淨係講好左只係做需要做既野，集中做好，減低出事既機會，咁樣你又輕鬆D，長老又滿意。
隨便舉個例，就算要過大禮，要出門入門，咁可唔可以省略安床呢？可唔可以省略上頭呢？可以既話你前一日就可以輕鬆少少。當然每個儀式都有佢既意義啦，但如果冇人在乎，我就覺得省略左佢比較好。例如我屋企人就係覺得唔需要上頭既。
又例如你既平輩朋友會唔會可以唔需要派實體請帖，用 Soft copy 代替呢？咁樣你又可以省略周圍寄信或者見面派帖，又環保D。不過留意返，帖入面Suppose係有封小利是既，可能會有人介意架下。
【Shareholders】
Shareholders 哩度我指「場婚禮要對咩人交待」；亦即係「邊D人提出既意見係重要既」。哩度我要提醒，除左一對新人自己、四大長老，千祈唔好忽略四大長老既四大長老，即係你地既祖父母。
我就係一個好例子 - 係婚禮既兩個星期之前，竟然臨時需要加兩圍。而哩個要求既源頭係來自祖父母。
我唔係話祖父母蠻不講理，現實情況係︰老人家唔會隔代干預你點樣搞場婚禮，但佢地係有期望的，而佢地會將期望話俾你四大長老知。而四大長老又會出於孝心，想滿足你祖父母既要求。咁當佢地同你講「佢地都一把年紀啦，我地可唔可以盡量滿足佢地既心願？」你就好難拒絕。咁我地可以做既，就係為哩D情況做好準備，又或者盡可能早D同祖父母輩溝通，提早了解佢地既要求，尤其是有咩客人想請。
以下我會以做哂 1 2 3 4 5 6 7 所有野為前提咁寫
第二章︰挑選各種服務 及 使錢的地方
搞婚禮第一件事就係擇日同埋Book場，其他野全部都係 depends on 你個 Big Day 既日期；除非你出門入門證婚同晚宴分開日子啦~ 但我就覺得咁樣仲煩吶…
【擇日】
擇日你可以俾錢搵算命師傅，或者上網自己搵。有人會認為吉日係要夾時辰八字所以要搵算命師傅，睇下你去到咩 level 啦～
但留意網上既黃曆相差之大係可以出現矛盾（一個話吉一個話凶）；所以最緊要係四大長老Approve左既日子。
【初步估算人數】
因為唔同場地都有人數限制，除左上限亦都有下限（最低消費），所以某程度上你需要同四大長老估算左大概需要請幾多人，先可以比較安全地選擇到場地。
【場地】
首先我強烈建議選擇酒店，唔建議揀酒樓。最大既原因係酒店有酒店房。酒店房太有用了。
(1) 酒店可以提供套房做出門 / 入門房
(2) 你可以Book多一至兩間房做女家屋企人或者姊妹前一晚既留宿同埋擺放物資，因為女家屋企人同姊妹正常要好早起身
(3) 晚宴後可以直接係酒店房訓
同埋，雖然 Club One 之類既婚宴場地係平D，但你都知道坊間俾人情都係睇你擺酒樓定酒店，酒店標準$1000+，Club One 就變 $800+，到最後其實唔係差好多錢，但有冇酒店房真係差好遠。
我個人建議要有一間房係連Book兩晚，哩間房前一日就可以開始存放物資，直到結完婚當晚新人直接係哩間房訓。
有一間房專門存放物資既好處係，你只會拎需要既物資前往某個地點，唔需要因為 checkout 而搬一次所有物資，哩個過程容易唔見野（筆者老婆就唔見左一件頗重要既飾品…）
另外，最好出門入門都係酒店房，你連車都唔駛，又可以少兩次物資既搬運（每搬一次物資，就多一次唔見野既風險）；
但就算四大長老堅持出門入門都要係自己屋企既話，晚宴之後有間酒店房俾你放物資同沖涼訓覺，我覺得對到時非常疲倦既你來講都會覺得值得。
然後揀酒店亦都要考慮同男女家既交通距離（如果可以出入門都係酒店就唔需要，掉返轉考慮方唔方便主要親友既居住地點），因為受吉時所限，朝早出入門敬茶其實時間係緊張。
推薦酒店仲有其他原因，例如我覺得服務配套會好D，以下我唔肯定Club One果D有冇啦，但我有印象而重要既服務包括︰
1) 提供新娘房，新娘房有足夠空間擺放物資、有夾萬俾你擺人情同金器等貴重物品，有俾新娘換衫既屏風
2) 前一日開始提供某D物資既存放服務，例如回禮禮物同酒 （尤其是酒，咁重。通常都可以叫酒公司直接前一日送去酒店禮賓部）
3) 幫你擺好回禮禮物係每一個座位上面
4) 全程有個人專門服務新娘，幫佢調整裙擺、提裙尾等等
【Big Day 各項服務】
當你決定好場地同日子之後，你就可以開始搵當日既攝影、錄影、化妝、服裝、場地佈置、花車哩幾樣需要其他人提供既服務。
首先我介紹一下你可能會覺得陌生既名詞先
2P1V︰2 Photographer 1 Videoman
順帶一提，點解需要2P呢？因為除左一個主要攝影師係用來影合照（大家擺好Pose面向鏡頭笑果種）之外，仲有另一個攝影師負責影「Snapshot」，故名思義即捕捉精彩瞬間既攝影師。
通常影 Snapshot 比影合照更加需要技術，因為佢要好似獵人咁集中留意有咩精彩既瞬間，亦都需要搵角度同構圖。
我自己當初為左慳錢（亦假設因疫情限制要分好多間房，4人一檯），只係揀左1P1V，但因為我老婆有個同事識得攝影，幫我地影左好多好靚既 Snapshot，而我望到果D Snapshot，我決定向大家推薦 2P1V。
講真，合照真係純粹留念、紀錄，一張合照真係冇咩美感，講唔到D咩故事，我估你一世人都唔知會拎出來睇幾多次，但又冇可能唔影，可謂食之無味棄之可惜。但 Snapshot 唔同，當中可能有一D好真誠既笑容，你屋企人感動落淚既瞬間等等，我覺得哩D相先係真正有價值既相，相信大家亦都會覺得 Snapshot 比合照更加值得回味。所以，貴就係貴D架啦，但都誠心建議大家認真考慮2P1V。
MUA︰Make Up Artist，即化妝師
然後我要講一樣野就係，我真係唔建議大家搵一條龍（通常指攝影 + 服裝 + 化妝同一間公司），除非大家真係好需要慳錢。
就算你真係真係決定搵一條龍，最起碼都要搵攝影店既一條龍。千祈唔好搵服裝店既一條龍。
大家要明白，世上冇免費午餐，點解一條龍會特別平？因為一條龍一定係得一樣野做得好，其餘兩樣水準係業界平均以下，先至可以做到比分開搵平既價格。
你如果搵攝影店既一條龍，你就要預左服裝同化妝會達唔到你既要求；你如果搵服裝店既一條龍，你就要預左攝影同化妝你會唔滿意；尤其是服裝店一條龍，好大機會係搵Freelance攝影師，質素冇保證。尤其是如果你果日係旺日，好既攝影師一早俾出得起錢既攝影店用哂，咁又剩返d咩攝影師俾你用呢？
亦都唔好睇小化妝，好既化妝師真係可遇不可求，據我自己觀察，大部份化妝師可能都係「一套準標流程」，做哂所有步驟就叫化好妝。但一個好既妝，真係需要個化妝師了解新娘塊面既特色，調整自己個妝去突顯新娘既魅力，咁先唔會化完好似變左第二個人，又或者個妝濃得好核突。
所以，各位準新娘如果有時間，真係建議花多D時間同錢試妝，當買個保險；當晚大部份相都係為你而影，如果你個妝 Fail，D相影得幾好都係 Fail。
花車同場地佈置冇咩特別野好講，服裝都只不過係一個Checklist：
1) 新郎禮服、皮鞋
2) 新娘婚紗 + 1~2件禮服、1~3對鞋
3) 雙方母親禮服（哩個我自己覺得，未必需要去租好正式既禮服，著自己本身有既禮服都可以，因為出面租一來貴二來其實未必好好睇。但可能需要注意唔好其中一方特別搶眼，所以需要夾）
4) 雙方祖母 (如健在) 禮服 (通常都係旗袍?)（同上）
5) 兄弟西裝、姊妹裙
6) 新郎馬褂
7) 新娘裙褂 (有分小五福大五福褂皇褂后，哩D你到時去租就一定知，哩度就唔多講)
【其實 Facebook 評論係好有用】
哩度同大家講一樣好有用既野 - Facebook Page 既「評論」，Page主係冇辦法刪除負評的，只可以關閉成個評論功能；而且唔似得Openrice咁有審核機制，你寫完就會即刻公開，少d利益輸送問題。
當然啦，正評一樣係可以洗，負評一樣可以係抹黑；
但我自己覺得可以Click入去D評價望下Account有冇歷史，如果D評論都係來自睇落係正正常常有返咁上下年代既User，咁我覺得可信性都高。佢唔似其他評論平台咁，好容易就開到假 account 去留正負評。
我自己暫時認為 Facebook Page 評論係幾可靠既參考，我裙褂、Big Day 一條龍、場地佈置，Facebook 評論係好重要既決定因素，so far 都冇伏。
冇錯，我自己用左一條龍但叫人唔好用一條龍 XD 同埋我間一條龍其實未返相，所以哩一刻都比較難評論。但至少當日既工作人員表現都相當專業，我覺得我俾既價錢有哩個水平係相當滿意。
Google Map 既評論一樣都係 Owner 冇辦法干預，只能回覆；不過我個人認為 Google Map 比較容易刷評論，可能集中睇一d比較有歷史既 account 會好d。
同埋香港人似乎習慣用 Google Map 評論餐廳，用 Facebook Page 評論服務。
裙褂同 Decoration 公司都係非常滿意。哩兩間我可以開埋名 - 裙褂我係太子金都既「裙褂皇后」租；Decoration 係火炭既「Function Decoration」。
【婚紗相】
哩個呢，有平有貴，真係好視乎一對新人既要求。但我有 D general 既心得可以分享下。
1. 同 Big Day 一樣，MUA太重要。但 Pre-Wedding 好似比較少有得試妝.... 筆者因緣巧合之下影左兩次 Pre-Wedding，一次係外景，一次係影樓；但影樓個妝靚太多太多，結果意外地影樓D相壓倒性地靚過外景D相。壓倒性。
2. 承上，可能因為影樓始終係室內，個妝咁冇易溶。
3. 又承上，我當時影係炎炎夏日，仲要貪心地揀3個景點。結果第三個景點個妝根本不堪入目，真係衰過素顏。如果大家時間允許，真係唔建議夏天影；就算真係夏天要影，都唔好一日三個景點…
4. 唔好剩係睇 Package 價錢。包精修幾多張相，有冇油畫，相簿幾大，哩D其實都重要。有D公司初始 Package 好平，但加精修相片數量、相簿加相、加大等等 Add-on items 好貴。呀仲有我聽過有D連俾埋原相你都要加錢，哩d就直頭黑店。
5. 好似係要俾利是攝影師同化妝師。
6. 筆者揀既影樓係觀塘既 S.A. Wedding (Team A, HK)，非常滿意。
【其他主要開支項目】
Big Day 晚宴當日 Crew Meal︰你既工作人員都要食飯，你可以叫佢埋檯，但你要確保有位，或者留左位俾佢地；一係就叫 Crew Meal。當然，酒店既茶記餐都係好貴的。你預一個揚洲炒飯200幾蚊
素食者賓客︰每一位素食賓客，酒店都會另外為佢準備一份素食餐點，我果間酒店係另外收 $680 一位。
到場證婚律師︰一般$3000~$4000。
婚宴額外酒水︰因為酒店通常只會包橙汁汽水同啤酒，但四大長老係唔會接受賓客冇紅酒飲的。所以你一定會需要另外買酒，我自己係用「酒在一囍」，因為佢有退酒服務，D酒係一箱箱送去酒店，通常一箱6枝，未開封過既箱可以退返俾佢，佢仲要有專人過來拎你要退既酒，唔使你自己搬過去俾佢，服務相當好。而要訂幾多酒就視乎你D賓客飲唔飲酒，但業界好似有個標準係每圍兩紅一白。但如果你肯定你D賓客唔飲，你都可以考慮叫少D。同埋，你要睇埋有冇需要買其他酒例如 Whisky，我呀爸就為左等少數賓客有好既洋酒飲，特登訂多一箱 Hennessy VSOP，哩箱仲要冇得退...
Big Day 眾人車費︰除非出門入門證婚婚宴都係同一間酒店進行，如果唔係你多數會需要交通。上網搵到好多 Rundown 都係租一架 28人Van，我覺得可能多數情況下都 Overkill？我自己就係花車 + Uber解決；方法你自己決定就得，重點係你既兄弟姊妹、男女家屋企人同工作人員既車費你要俾埋~
Big Day 眾人午餐︰通常出入門都係朝早進行，多數入門完敬完茶就可以開始午餐環節。咁除非你男家真係好大，如果唔係9成塞唔哂所有男家屋企人+兄弟姊妹；所以你要安排埋午餐俾冇得係男家食午飯既人，多數係工作人員同兄弟姊妹。有D工作人員亦都可能會選擇自己解決。
各種利是︰標準應該係新人、男女家父母、男女家祖父母都會包利是俾︰工作人員、兄弟姊妹、保安、酒店工作人員.... 哩方面可以上網睇下。
過大禮︰豐儉由人但最重要係男女家有共識。坊間亦都有D過大禮公司，我自己係係婚展入面選擇左「金氏海味」，一切順利。
禮金︰哩個就真係.... 好視乎女家既要求啦。
金器︰正路應該係男家父母會買金器俾新人，新娘為主；女家父母會買金器俾新人，都係新娘為主。我自己就覺得哩一筆花費係最唔抵既，益哂D金器公司....
餅卡︰好似係女家派帖要俾埋餅卡因為叫「嫁女餅」。因為一張都至少$50所以哩筆數都唔細架。
結婚對戒︰都係豐儉由人，筆者無論求婚鑽戒定係結婚對戒都係一間叫 Diamania 既樓上舖買，非常滿意。
絲花花球︰出門、影相，March In 等等都要用，而且可以買二手，賣二手，相當實用既野~
其他零碎物資就唔寫出來，係第四章先以物資形式出現啦。
第三章︰其他事前準備
【搵兄弟姊妹】
我個人覺得最少需要6個兄弟姊妹（包括伴郎伴娘），如果你係搵埋兄弟姊妹做MC，咁就最好加埋8個。
【搵MC】
視乎你既要求，睇下搵兄弟姊妹做就算，定係搵個專業既MC。
【Rundown】
哩樣野比我想像中困難，畢竟我自己冇做過兄弟姊妹，身邊又冇比較熟既同輩親人或朋友係結過婚可以做我既顧問，所以實際做落發現好多細節好難想像…
而哩份 Rundown 除左真係 Rundown 之外，亦包括：
1）座位表
2）MC稿（如需要）
3）晚宴合照次序
4）Contact List
5）物資清單
我初頭都係諗住上網搵 Template，但發現都係唔岩用。我估你都係乖乖地由一個 Empty Excel 開始整啦～
【影片及音樂】
影片有三樣：成長片段、常駐 Slideshow、早拍晚播。攝影公司會包辦成長片段同早拍晚播，Slideshow就我自己整既。
音樂睇你自己要求，我係恭候、March In、證婚、入席都係唔同既 BGM。如果你要求簡單，咁最起碼 March In 都有專屬既音樂先。
另外你亦都要諗定成長片段用邊首歌俾攝影公司做，雖然你完全可以收到片之後先自己 edit 😂
【開會】
你既 Rundown 完成度去到 90％ 咁上下既時候，你需要搵男家家人、女家家人、攝影師同兄弟姊妹開會，等大家了解你既流程，提出疑問或者俾建議你。
【搵一個可靠既 Big Day 主力指揮】
因為 Big Day 當日新郎新娘都可能因為各種原因（例如係台上面呀，換緊衫等等）無辦法好快回答或處理到一d問題，
如果你有一個兄弟姊妹係份人可靠，並且能夠熟悉你份 Rundown 既人去做輔助指揮甚至主力指揮，會比較好。
【申請一張有吸引迎新獎賞既信用卡】
你既結婚消費會高達6位數字，哩個時候梗係要用盡d信用卡既優惠，最好就係申請一張有迎新獎賞既信用卡！
可惜，我完全冇諗過咁做… 蝕左！
【請假】
我個人認為最少 Big Day 前一日同後一日你都唔可以返工，前後兩日你都需要處理物資，最重要就係拎衫還衫。
第四章︰各個環節的摘要
哩一章既目的在於幫你整理需要進行既事件同物資，相信對你寫Rundown有幫助。
以前我以為參考人地 Rundown 就夠我做啦，但真係唔係，人地 Rundown 唔會有「點解咁樣安排」寫出來，而且每個人做既野或多或少都有唔同，就算有一份現成 Rundown，你最後都係需要自己再搵好多資料....
咁當然，我哩度講既野，一定唔會囊括哂所有野，但我相信係有8成既，淨低2成就靠你自己努力啦。
【Pre-Wedding】
所需物資︰利是（筆者唔肯定係咪行規），準新郎要裇衫、皮鞋、皮帶；準新娘要Nubra、高踭鞋。隱型眼鏡[註1]
註1：有公司同我講因為抗藍光眼鏡影外景有可能眼鏡鏡片反光後會有一片藍色，冇得P，所以叫我戴隱型眼鏡，再拆左原本眼鏡既鏡片剩係戴框。
【過大禮】
所需物資：大量海產乾貨，我真係唔識數，因為我係搵過大禮公司套餐 XD；另外有禮金、包羅萬有利是、舅仔鞋利是、姨仔裙利是；然後女家要準備女婿金。
過大禮通常係婚期之前一至兩個月發生，
流程就好簡單，擇個吉日吉時，準時送貨上女家就得（過大禮公司通常包送貨）。但根據傳統規距既話，送貨上去既唔可以係新郎或男家父母；可以係男家既親戚或新郎既朋友。
如果新郎想合照的話，就要係門外或樓下等（都等幾耐，因為女家通常會拎d野出來擺得整整齊齊先再影相）
送貨上去果個因為好可能全部人佢都唔識，會尷尬，慎選；至少要有一個人係外向少少可以緩和尷尬氣氛，同埋完成時需要講句說話作為「禮成」既象徵，如果唔係新郎會唔知幾時先有得入去影相 XD
禮金同包羅萬有都係要回禮的，所以正常應該係男女家都有共識包幾多同回幾多，拆開兩張支票，再準備埋回禮利是（通常過大禮套餐俾埋）。
至於海味生果等等既回禮，可能亦需要另外 call 車；我自己因為父親本身就係客貨車司機，所以送貨送回禮都係佢車埋（但佢就要係樓下停車場等），冇哩個困擾
【安床＆上頭】
唔知你屋企有幾傳統，上頭哩個儀式連我上一輩都未必有做。我地係因為過大禮個套餐有包埋教學同物資，所以先順便做埋。
哩兩樣野我真係識條鐵，所以我決定唔多講，如果你有買過大禮套餐，不妨跟佢地既教學進行。
除左跟過大禮公司既教學同物資之外，我地另外做左以下幾樣野：
1）買左新郎同新娘既紅睡衣 for 上頭用既；第二朝中式出入門一樣都係著住紅睡衣。
2）煮湯圓食
3）拜神
4）俾利是父母（感謝養育之恩）
同埋，唔知哩樣野有幾嚴格：女家要係男家上完頭之後先可以上
【Big Day 出門】
先來個流程圖，如果唔係純文字可能比較難想像，尤其是男女雙方分開進行，時間唔係線性咁去
所需物資：
1）新娘褂、褂鞋
2）新郎褂、皮鞋／褂鞋、攔門花球（我自己嫌樣衰冇戴，但讀完愛的宣言係要用的，所以係出門房物資之一）
3）兄弟利是、姊妹利是、開門利是、工作人員利是
4）花車佈置例如車頭公仔等等（如有）
5）兄弟襟花、姊妹手花
6）敬茶道具（酒店可能會提供部份）（包括茶壺、茶杯、紅色紙杯、跪墊、茶葉、紅棗蓮子）
7）金器及利是容器（統一儲存避免因混亂而遺失；個人認為未必需要記錄邊個俾，因攝影師會影相記錄）
8）乾糧
9）玩新郎所需物資
另外新郎出門口記得帶身份證、各項尾數、收據、Petty Cash。
至於流程，首先你睇左流程圖有個大概印象先，我下面做補充說明。
第一，所有野既時間，理論上需要遷就吉時。例如吉時係9～11點（好似通常都係），咁就睇下男家需唔需要入門儀式都係11點前完成（咁會趕到痴線），11點前入到門都得（好d），定係11點前出到門就得（最好）。
然後再用哩個 deadline 時間去倒推每個環節需要幾點發生。一般新娘化妝預兩個半小時。
另外，兄弟最好可以係到達之前，一齊買少少早餐（M記？）上去出門房俾姊妹等人食野，再落返去樓下拍攝花絮。新郎同兄弟們早餐就出發之前解決啦，或者唔食。
新郎如果需要化妝，有兩種方案：（1）出入門房同一酒店，副化妝師直接去入門房幫新郎及男家母親化妝；（2）副化妝師到酒店樓下幫新郎化妝，再出發去男家幫男家母親化妝。你睇，如果出入門都係酒店真係好方便…
開門利是記得要拆散俾，因為正常好似姊妹收到第一封會話唔夠，要加碼，我果陣無知，一封過，結果冇得加都幾尷尬 😅
愛的宣言呢，因為早拍晚播，我估通常係會成段剪哂落去，所以好似唔好太肉麻會好d 🙈 或者你有心理準備就得啦！
最後離開出門房時，大妗（如果冇大妗通常姊妹代替，為方便我下面全部用大妗哩個角色表達）全程要用紅傘遮住新娘直到入門，然後係室外地方再用少少唔知豆定米灑係紅傘上面（哩個我覺得 optional，又搞到一地都係米，會麻煩到其他人幫你清理）
其他細節地方，包括敬茶既流程，我認為可以遵從攝影師指示就可以了，唔駛計劃得過於仔細。但時間上要預鬆，我當日新娘及姊妹準備時間不夠，足足遲了30分鐘。
【出門到入門 － 轉場】
如果你係出門入門同一間酒店，只係步行過去另一間房，咁你可以直接飛去下一個部份。
轉場有幾樣野要注意，
1）所需人手：理論上，你應該會需要留大部份兄弟姊妹係出門房負責處理物資，清走裝飾，然後Checkout出門房；只帶需要既人員（敬茶助手、大妗、金器保管員）前往男家。
2）交通方法：我上網見到好多人會用28座單層巴士，我諗哩個係因為女家唔係係酒店出門，所以需要帶哂所有兄弟姊妹工作人員前往男家或酒店。我自己既情況係花車 + 一架Uber解決由出門房前往入門房既交通。
然後，係男家樓下，保安見到新郎著哂褂咁，應該會好用熱切既眼神期望你既利是，如果見你冇俾甚至可能黑面 😂 我自己就覺得唔需要俾，但四大長老通常都會覺得俾埋好d，保安果封就比較細封既，的確係冇咩所謂。
【入門及午餐】
其實入門真係好簡單，尤其是你係出門時已經做左一次，而且除非你係擺午宴，如果唔係時間應該係比較鬆動。
基本上就係敬茶同影相，完。
物資：敬茶道具，新郎禮服
至於午餐，我假設男家係擺唔落咁多人，我既做法係：
提早好多係酒店或男家附近訂好位俾兄弟姊妹 + 工作人員食飯。工作人員食完飯之後會自己搵位做野／休息；兄弟姊妹就返酒店房。
然後新郎新娘、男家家人、伴郎伴娘（Optional）係男家食飯。至於係男家食乜就悉隨尊便啦，我地係男家本身準備左野食，再外賣自取中式點心。
哩個時候，新郎應該係男家除低馬褂，換上禮服。
然後新郎新娘等人再花車／Uber 前往酒店。我既情況係男家家人隨後自行前往酒店。
新娘返到酒店房之後，如有需要應該先沖涼／抹身（因為上面講到既紅睡衣染色問題），然後睇下係先換上便服定係直接換禮服／婚紗，視乎你係證婚之前需唔需要再同兄弟姊妹影相。
【證婚之前】
係哩度我講下證婚先，證婚通常有兩種
一種係下午係戶外草地證地，通常觀禮既人唔多，然後晚宴就唔會有證婚既部份；
一種係作為晚宴既其中一個環節進行。我自己係後者，一來戶外證婚我唔想處理天氣既變數，二來我覺得證婚先係重點，想多d人見證，比較有意義，又會令晚宴既節目稍為豐富少少。
無論你揀邊種方式，哩個部份我會講下證婚之前你通常需要／可以做d咩：
1）包裝回禮禮物
回禮禮物係指到場既賓客會拎走既一樣小禮物。我自己係回一小罐蜜糖：
（Google圖片）
但哩d蜜糖你買返來通常都冇包裝，會需要叫兄弟姊妹幫手用一d回禮專用既包裝盒仔裝起佢，
然後酒店應該會肯幫你擺係每個座位上面。
2）額外影相（外影？）
我個人就認為哩段時間爭取時間休息比較好，但如果新郎新娘精力充沛，酒店附近又有適合影相既地方，而你又係係晚宴途中證婚所以時間充裕，咁可以用少少時間影下相既。（但通常需要係同攝影師夾 Rundown 既時候講明，有機會要加錢）
3）將晚宴需要用既物資移動到新娘房
如果酒店有提供新娘房，哩個時候應該要將晚宴（下面提到既 Reception + 證婚 + 晚宴）會用到既物資搬去新娘房。新娘房應該會有保險箱，你可以將d金器放入去。
4）確保身份證
確保新郎新娘同兩位證婚人有帶身份證！哩個時候應該係最後機會。
5）檢查場地音響
酒店通常都會有個 Technician 負責當晚既影片及音樂播放，你需要將整理好檔案既電腦或USB（視乎酒店要求）俾佢，然後向佢解釋咩時候要播d咩，音量控制等等。佢多數係身經百戰的，所以應該好容易明你講咩；但希望你唔好好似我咁遇到一個覺得自己大哂，唔肯聽我仔細安排既 Technician… （我有段音樂係特登 cut 左係台上敬酒時開始播，用來炒熱氣氛，但佢冇播到，直到上菜先播，好彩上菜時播效果都唔差）
6）補敬茶
如果四大長老要求，可能會需要係晚宴開席之前補敬茶。補敬茶既意思係，因為一d親戚係朝早出入門既時候冇來／冇咁早來，
但輩份上又需要向佢地敬茶，咁通常就會叫佢地晚宴提早到場（恭候期間），係宴會場地既台上面同佢地敬茶。
酒店應該會提供跪墊同茶具，但紅紙杯同紅棗蓮子照樣係要自備；然後同樣需要敬茶助手、大妗同及金器保管人員。
7）派利是俾宴會場地工作人員
聽講一般做法係，場地會有PIC，先派一封俾PIC，然後問佢有幾多個人在場做野，交細利是俾佢每個人派一封。
【證婚】
先上個流程圖，但我先聲明，哩個係我律師進行既流程，可能係有彈性係入面，其實你望一望有個印象就OK，一切聽從律師安排就可以。
(2024年2月26日 Update: 我發現有唔少新人都係證完婚之後完會先March Out再重新March In，我諗Standard應該係有哩一步。我自己就冇做到，但話返俾大家聽)
所需物資：花球、誓詞稿、結婚對戒、身份證、結婚證書盒、致辭稿（律師應該會提供其他物資例如簽名用羽毛筆）
律師理論上係會提早半小時到場，佢到場之後，MC應該會需要同佢簡單夾下交接時既稿。
上述流程，如果係戶外證婚，新郎出場之前應該純粹係MC講野，致辭之後應該係合照；
如果係晚宴證婚，新郎出場之前應該係播成長片段，致辭之後如果你冇其他節目就應該係開席食野了。
至於拋花球，我果陣因為場地限制，冇拋到，所以我唔知應該係係邊個時間點拋 XD
【Reception】
Reception 我決定拆開講，因為牽涉既物資有d多。
必要物資：座位表、座位表架（酒店多數會提供）、簽到表、男家親友人情容器、女家親友人容器、新郎新娘朋友人情容器
Optional 物資：簽名牌、簽名薄、簽名筆、油畫、油畫架（酒店應該會提供）、你 Pre-Wedding 獲得既相簿及相架（酒店應該會提供相簿檯）
Reception 有三張檯：
（1）迎賓檯
最少有一兄弟一姊妹駐場，有賓客入場時，會 mark 低邊個來左。我覺得唔需要 mark 低邊個俾左人情，因為其實絕大部份人都會寫名（除非你真係好 care 邊個有俾邊個冇俾…），最重要係分返開四大長老既客人同你既客人，因為如果四大長老唔收禮，你要拎到屬於佢地既利是俾佢地。簽到完，收左禮（如有），然後就可以叫賓客簽名，一般都係簽名簿；而家開始流行其他形式，例如寫係牌仔上面入落去一個亞克力膠盒裡面。
（Google 圖片）
（2）相簿檯（Optional）
哩個冇咩好講，就係將你地既結婚相相簿同相架展示出來等大家揭來睇
（3）點心檯（Optional）
哩個我冇做，所以俾唔到d咩建議大家，我果陣係酒店有送蛋糕，如果有賓客想食就會serve。
如果你想做得再華麗一d，有d人會同酒店（或其他舖頭？）買埋西式點心放係點心檯上面，等客人自己拎來食。
【晚宴】
終於到晚宴啦！因為 Reception 同證婚分開左講，所以以下物資唔會包括哩兩個部份。
簡單流程：
必要物資：新娘所有服裝、電腦／USB、花球、主人家襟花
Optional 物資：直播設備、金器（可以著住其中一套禮服時戴上）
因為上面已經講左證婚同Reception，所以哩一部份除左上面個流程表，可以講既野就唔多了。
新娘係開席之後，可能會有時間係主家席食少少野，先再入去換衫。換完衫之後應該就係敬酒時間
哩度特別提一下，因為疫情既限制，酒店未必會俾你逐檯敬酒，我就係哩個情況，所以係致辭之後係台上面一次過敬酒，然後就開席；
但酒店應該就唔會阻止你係冇拎住任何食物飲品既情況下去同你既朋友打招呼傾下計（雖然新娘應該冇時間），反正四大長老都一定會咁做。
另外合照特別提一下，我既 Rundown 原本係寫好哂合照既次序，四大長老都點左頭；但最後佢地都係會臨時改。
所以我建議大家，四大長老既親友合照部份，MC唔好講埋下一檯輪到邊d人，睇下四大長老有冇臨時需求先。（當然，MC手上都係需要有次序表）
反正佢地既親友一般都坐得比較近台，唔駛特登叫佢地台下準備。
如果你有敬酒環節，通常敬完酒就可以直落影相；如果冇，為免打擾到賓客食主菜，通常會係上炒粉麵飯之前開始合照。
至於直播設備呢，我係因為我有d朋友唔係香港，但又想俾佢地睇到。所以證婚部份就做埋 Facebook Live；
但提一提大家一個小細節：如果你想用橫島直播，記得先將手機個方向轉做橫島先開始直播，開始直播之後就轉唔到架啦。
【晚宴後】
晚宴後，你基本上就大功告成架啦，剩低就係執下手尾。
所需物資：＄＄
因為酒店應該係哩個時候先會同你收尾數，條尾數應該係好幾萬蚊以上的，有機會你信用卡都唔夠信用額，要用現金填補。
四大長老會送客送到基本上走哂，然後佢地都可以返屋企架啦；
兄弟姊妹應該都係幫你將宴會廳同Reception既物資收拾好去新娘房之後都可以返屋企～
然後你可以問酒店借一架手推車，將新娘房既物資 pack 好，佢地可以幫你送上房～
然後你地就都可以上酒店房沖涼，訓教，準備第二日還衫之旅 😂
【回門】
我個人認為回門哩個儀式係已過時的，但如果長老要求要有，你最好問下長老有d咩要求；
我個陣就係做多左，但亦因此好簡單，只係封個利是（代替乳豬），買支靚酒，同老婆一齊返娘家食個晚飯。
結尾
坦白講，哩篇野由我結完婚寫到而家斷斷續續寫左成個月，到後期我都開始唔記得d細節 🙈
但起碼我 Rundown 裡面有既所有野都囊括左，我相信點都幫到新人的。
歡迎大家係下面留言補充資料，我有時間既話都會願意 keep 住更新的～
最後祝大家結婚一切順利，白頭偕老！
留言列表
